DAKILANG KAPISTAHAN NG PASKO NG PAGKABUHAY K
PAG-ASA SA PAGKABUHAY!
JN 20: 1-9
MENSAHE
Kasama ng lahat ng mga Kristiyano sa buong mundo, ipinagbubunyi natin ngayon ang pangyayari na nasa gitna ng ating pagkakaisa – ang Muling Pagkabuhay ng ating Panginoong Hesukristo! Madama nawa sa ating puso ang “Aleluya” at masambit sa ating bibig ang “Maligayang Pasko ng Pagkabuhay!” dahil ito ang araw na ginawa ng Panginoon! Sa ating pagdiriwang ng tagumpay ni Kristo laban sa kadiliman ng kasalanan at kamatayan, balikan natin ang mahahalagang sangkap ng kapistahang ito:
Una, ang Pangyayari. Tunay nga na nabuhay muli si Hesus! Tulad ng kanyang pagpapahayag ng kanyang kamatayan, gayundin naman sa kanyang pagbangon mula sa libingan. Ipinahayag ng mga anghel ang naganap, nadinig ito ng mga babaeng alagad, at mismong naranasan ng ilan tulad nina Maria Magdalena at ng mga alagad sa daan ng Emaus. Bilang mga Kristiyano, hindi lang natin sinasabi “natitiyak naming ito” kundi “tiyak na tiyak” na nabuhay ngang muling si Hesukristo!
Ikalawa, ang mga Saksi. Natural na sa simula may mga hindi makapaniwala maging sa mga alagad. Nag-unahan pa nga sina Pedro at Juan upang makakuha ng patunay, at nang makita ang libingang walang laman, kahit na nagugulumihanan, kapwa silang nakakakita at naniwala. Tulad nila, bilang mga alagad ngayon, tayo ay saksi sa galak at pag-ibig, sa presensya at kapangyarihan ni Hesus na alam nating buhay magpakaylanman!
Ikatlo, ang Pag-asa dumadaloy sa Muling Nabuhay. Sa krus, sinariwa ni Hesus ang kanyang pag-asa sa pagmamahal ng Ama. Ngayong nabuhay siyang muli, si Hesus ang pag-asang hindi mabibigo. Nasasaksihan natin ang mga katuparan ng kanyang pangako sa Kasulatan, sa simbahan, at sa kasaysayan. At taglay ang pananampalataya, puno tayo ng pag-asa na ang ating mga krus ay magiging luwalhati, ang pasanin ay maiibsan, at ang mga luha ngayon ay magiging dalisay na kagalakan. Sa Kanya, ang ating Tagapagligtas, ang ating Pag-asa!
MAGNILAY
Ipagdiwang ang Pasko ng Pagkabuhay sa pamamagitan ng pagbabahagi ng kagalakan; gumawa ng anumang tanda ng pagmamahal o kawanggawa sa isang nangangailangan makadama ng presensya ng Panginoon sa linggon ito. Maligayang Pasko ng Pagkabuhay sa lahat!
