PANALANGIN PARA SA MGA AMA (Fathers’ Day)
Ama naming Makapangyarihan,
Maylikha ng langit at lupa.
Noong iyong ipinagkaloob sa amin
ang Iyong Bugtong na Anak na si Hesukristo
upang maging aming Manunubos,
niloob mong ipagkatiwala Siya
sa ilalim ng pangangalaga ni San Jose
bilang kanyang ama dito sa lupa.
Hinihiling namin na Inyo pong basbasan
ang lahat ng mga Ama at Lolo
sa araw na ito.
Pagkalooban mo po sila ng lakas
mula sa iyong Banal na Espiritu;
upang kanilang mahalin nang may katapatan;
at maitaguyod nang may pagtitiyaga
ang kanilang mga pamilya;
at upang sila ay maging huwaran
ng mabuting pamumuhay bilang mga Kristiyano.
Amin ding inaala-ala ang lahat ng mga amang naghahanap-buhay
sa labas ng bansa upang kanilang matustusan
ang mga pang araw-araw
na pangangailangan ng kanilang pamilya.
Manatili nawa silang tapat sa Iyong mga kautusan,
Manatili nawa silang tapat
sa kanilang mga sinumpaang pananagutan
sa sakramento ng kasal;
at iadya mo po sila sa ano mang uri ng sakuna
at karamdaman sa pangangatawan.
Ito’y aming hinihiling sa pamamagitan ni Hesukristo
kasama ng Espiritu Santo magpasawalang hanggan.
Amen.
